Sonntagsritt in Küssnacht, 30.6.2013

Am Sonntigmorge esch si ois am halbi sechsi cho herte, im Pischema!
Was söll das? Am halbi nüni, esch si pozt und gschtrält, mech cho use nä. Si hed mech au of hochglanz poliert. Mähne und Schweif mit Sprei frisiert. “Bes e chli aständig, mer gönd of Küssnacht a Sonntigsrett zu de Claudia Wiget-Bünter”, hed si wärend em puze gseid. Wie wen i das ned immer wär!

Am nüni send den s‘Ronigers süferli um Kurve ome z fahre cho. Ech ha dörfe zo de Stjarna und de Goa i stige. Z‘Küssnacht send mer herzlich empfange worde. Sechs Isis und en risig grosses, tragends Chaltbluet hed zur Gruppe ghört.

Scho gli semmer de Hügel doruf galoppiert. Mini Lunge heds scho s erscht mol glöftet. Im flotte Tölt eschs de dor de schöni Wald gange. Högerli uf im Galopp, denn weder Tölt. Hej, die hends welle wösse. Ech als Flachländer ha ganz schön müesse schnufe. Zum Glöck heds no en Pause gä. Den eschs genau so rassig weder zrugg i d‘Allmig gange.

Det hani of d Weid dörfe, mit de Prinzessa. Läck, ech han en Ussicht gha of de See. Ech be ganz fasziniert gsi, d‘Böötli händ e so glänzt im Wasser. Ech ha immer weder müesse luege. Bim Wale hani ned z‘fescht dörfe a gä, soscht wäri no abe grollt. D‘Schefs händ den grilliert, feins Desser hebs au gä. Öberhaupt send mer alli verwönt worde. Es esch super gsi. Chome gärn weder einisch e chli cho sause! Im Name vo allne Danke für de schöni Tag.

Framtid vom Bühl

Bericht und Fotos Evi Zimmermann

Einladung zum Sonntagsritt am 30. Juni 2013